माझ्या डोळ्याचे रक्षण कौसल्येचा पुत्र म्हणजे प्रभू श्रीरामचंद्रांनी करावे.  पाहणे आणि दृष्टी असणे यात फरक आहे. त्यामुळे कौसल्येचा (कौसल्या म्हणजे जी कुशल आहे) आशिर्वाद लाभलेला तिचा पुत्र प्रभू श्रीरामचंद्र माझ्या डोळ्यांचे रक्षण करोत.  प्रत्यक्ष प्रभू श्रीरामचंद्र डोळ्यांचे रक्षक असताना कोणताही पूर्वग्रह / दुषित दृष्टीकोन नष्ट होऊन, जे जे जसे जसे आहे ते ते तसे तसेच बघण्याची दृष्टी प्राप्त होण्याची ही खात्रीच आहे. मी कोण आहे आणि माझ्या मध्ये काय काय सामर्थ्य आहे याची स्पष्ट जाणीव दृष्टीपथात येणार आहे.

माझ्या दोन्ही कानांचे रक्षण विश्वामित्रांचा प्रिय शिष्य असणाऱ्या प्रभू श्रीरामचंद्रांनी करावे कारण कसे ऐकावे हे फार महत्वाचे आहे. श्रवणाचे महत्व सांगताना समर्थ श्री रामदास स्वामी म्हणतात, “श्रवण केलियाचे फळ, क्रिया पालटे तात्काळ”. प्रत्यक्ष प्रभू श्रीरामचंद्र कानाचे रक्षक असताना सांगणारा काय सांगतो आहे तेच श्रवण केले जाईल. आपण जे ऐकू इच्छितो (पण प्रत्यक्षात सांगणारा जे सांगतच नाहीए) ते आता यापुढे, प्रभू श्रीरामचंद्र कानाचे रक्षक असल्यामुळे ऐकलेच जाणार नाहीए. आता केवळ सत्य श्रवण सुरु राहिल.

पाचवा श्लोक उद्या आपण समजून घेऊया.